جعفر ایکسپریس میں چیچہ وطنی کے قریب دھماکہ!!

پولیس نے بتایا کہ جمعرات کی صبح پنجاب کے چیچہ وطنی کے قریب جعفر ایکسپریس ٹرین کے اندر دھماکے میں کم از کم ایک شخص ہلاک اور نو زخمی ہو گئے۔

 ساہیوال کے ڈسٹرکٹ پولیس آفیسر (ڈی پی او) فیصل شہزاد کے مطابق زخمیوں کو تحصیل ہیڈ کوارٹر ہسپتال (ٹی ایچ کیو) منتقل کر دیا گیا ہے۔

 پولیس اہلکار نے بتایا کہ مسافر ٹرین بلوچستان کے مچھ سے روانہ ہوئی تھی اور پشاور جا رہی تھی۔

 انہوں نے نامہ نگاروں کو بتایا کہ "عینی شاہدین کے بیانات کے مطابق، دھماکا واش روم کے اندر اس وقت ہوا جب ٹرین میاں چنوں سٹیشن سے نکلی"۔

ڈی پی او فیصل شہزاد نے کہا کہ محکمہ انسداد دہشت گردی اور پنجاب فرانزک سائنس ایجنسی (PFSA) کی خصوصی ٹیمیں جائے وقوعہ پر پہنچ چکی ہیں اور شواہد اکٹھے کر رہی ہیں۔

 انہوں نے مزید کہا کہ "ہم دھماکے کی نوعیت کا پتہ لگانے کی کوشش کر رہے ہیں ۔

 اس سے قبل پاکستان ریلوے کے ترجمان بابر علی نے میڈیا کو بتایا تھا کہ ایس پی ریلوے دھماکے کی جگہ پر پہنچ گئے ہیں اور وہ جلد ہی واقعے کے حوالے سے تفصیلات فراہم کریں گے۔

 ریلوے حکام نے بتایا کہ جمعرات کی صبح پنجاب کے چیچہ وطنی میں جعفر ایکسپریس ٹرین کے اندر ہونے والے دھماکے میں کم از کم ایک شخص ہلاک اور تین دیگر زخمی ہو گئے۔

 پاکستان ریلوے کے ترجمان بابر علی نے زخمیوں اور ہلاکتوں کی تصدیق کی۔ انہوں نے کہا کہ دھماکے کی نوعیت کا تعین ہونا باقی ہے۔

 ملتان کے ڈپٹی سپرنٹنڈنٹ حماد حسن نے کہا کہ انسداد دہشت گردی ڈیپارٹمنٹ کی ایک ٹیم جائے وقوعہ پر پہنچ گئی ہے اور شواہد اکٹھے کرنا شروع کر دیے ہیں۔

 انہوں نے کہا کہ جیسے ہی ہمیں کچھ معلومات ملے گی، ہم اسے میڈیا کے ساتھ شیئر کریں گے۔

 دھماکے کی نوعیت کے حوالے سے پوچھے گئے ایک سوال کے جواب میں حماد حسن نے کہا کہ تفتیش کاروں اور مسافروں کی جانب سے مختلف قسم کی باتیں گردش کر رہی ہیں۔ "لیکن ابھی تک، ریلوے نے حملے کے حوالے سے کوئی سرکاری بیان جاری نہیں کیا ہے۔ پولیس کی تفتیش بھی جاری ہے۔‘‘

 اہلکار کا مزید کہنا تھا کہ اہلکاروں نے عینی شاہدین کے بیانات ریکارڈ کیے ہیں اور "دھماکے" سے متعلق معلومات اکٹھی کی جا رہی ہیں۔

 ڈی ایس پی نے یہ بھی انکشاف کیا کہ ٹرین کو چیچہ وطنی کے مضافات میں اس وقت روک دیا گیا جب ڈرائیور نے دیکھا کہ بوگیوں میں کچھ مسئلہ ہے۔