اسحاق ڈار آج بطور سینیٹر حلف اٹھائیں گے!

اسلام آباد: مسلم لیگ ن کے سینیٹر اسحاق ڈار آج  سینیٹ میں قائد ایوان کے علاوہ وفاقی وزیر خزانہ اور ریونیو امور بنیں  گے۔

وہ دوپہر کو بطور سینیٹر حلف اٹھائیں گے اور حلف اٹھانے کے فوراً بعد وہ قائد ایوان کے طور پر ایوان کی قیادت سنبھالیں گے۔  وزیراعظم آئینی طور پر پارلیمنٹ کے دونوں ایوانوں میں قائد ایوان ہیں اور انہوں نے سینیٹر ڈار کو ایوان کا قائد مقرر کیا ہے ۔  اعلیٰ پارلیمانی ذرائع نے پیر کو یہاں میڈیا کو بتایا کہ سینیٹر محمد اسحاق ڈار بھی سینیٹ کی رکنیت سنبھالنے کے 24 گھنٹوں کے اندر وفاقی کابینہ کے رکن کی حیثیت سے حلف اٹھائیں گے۔  انہیں پی ایم ایل این کے قائد، محمد نواز شریف نے وزیر خزانہ اور محصولات کے امور کا وزیر، مفتاح اسماعیل کی جگہ  نامزد کیا ہے، جنہوں نے ایک روز قبل ہی استعفیٰ دے دیا تھا۔

ذرائع نے بتایا کہ ان کے استعفے کی منظوری سے متعلق نوٹیفکیشن آج یعنی منگل کو جاری کیا جائے گا۔  سینیٹر اسحاق ڈار اس سے قبل 2012 میں سینیٹ میں قائد حزب اختلاف رہ چکے ہیں۔ وہ مارچ 2012 سے جون 2013  تک قائد حزب اختلاف رہے۔

چیئرمین سینیٹ محمد صادق سنجرانی  سینیٹر اسحاق ڈار سے رکنیت کا حلف لیں گے۔

ایوان صدر کو سینیٹر اسحاق ڈار کی بطور وزیر خزانہ حلف برداری کے بارے میں بھی آگاہ کر دیا گیا ہے اور صدر عارف علوی نے مبینہ طور پر حلف لینے پر رضامندی ظاہر کر دی ہے۔  اس سلسلے میں ایوان صدر میں ایک مختصر تقریب منعقد کی جائے گی۔  ذرائع نے مزید بتایا کہ حلف برداری کے حتمی شیڈول کا اعلان آج کیا جائے گا۔