چینی شہریوں پر قاتلانہ حملہ!

ایک پولیس اہلکار نے بتایا کہ بدھ کے روز کراچی کے صدر علاقے میں ڈینٹل کلینک کے اندر نامعلوم حملہ آوروں کی فائرنگ سےایک چینی شہری ہلاک اور دو زخمی ہو گئے۔

 جائے وقوعہ پر بات کرتے ہوئے ایس ایس پی ساؤتھ اسد رضا نے صحافیوں کو بتایا کہ فائرنگ سے ایک شخص جاں بحق اور دو افراد زخمی ہوئے جنہیں علاج کے لیے اسپتال منتقل کردیا گیا۔ انہوں نے تصدیق کی کہ تینوں چینی باشندے تھے۔

اسد رضا نے بتایا کہ حملہ آور مریض ہونے کا بہانہ کر کے کلینک میں داخل ہوا۔

 اس کے بعد جاری کردہ ایک پریس ریلیز میں، پولیس نے متاثرین کی شناخت 25 سالہ رونیل ڈی ریمنڈ چاؤ، 72 سالہ مارگریڈ اور 74 سالہ رچرڈ کے طور پر کی۔

 پولیس سرجن ڈاکٹر سمیہ سید نے میڈیا کو بتایا کہ گولی لگنے سے زخمی ہونے والے ایک شخص کو ڈاکٹر روتھ فاؤ سول اسپتال میں مردہ لایا گیا۔

ڈاکٹر سمیہ سید نے بتایا کہ باقی دو ایک مرد اور ایک عورت کو زخمی حالت میں جناح پوسٹ گریجویٹ میڈیکل سینٹر لے جایا گیا۔

 پولیس سرجن نے بتایا کہ دونوں زخمی غیر ملکیوں کی حالت تشویشناک ہے کیونکہ ان کے پیٹ میں گولی لگی ہے۔

 ادھر ترجمان کے مطابق وزیر اعلیٰ سندھ مراد علی شاہ نے اس واقعے کا نوٹس لے لیاہے۔

 وزیراعلیٰ نے ایڈیشنل آئی جی کراچی سے تفصیلی رپورٹ طلب کرلی۔ سرکاری بیان کے مطابق شاہ نے حملہ آوروں کی فوری گرفتاری کا بھی حکم دیا اور کہا کہ ایسے واقعات قابل برداشت نہیں ہیں۔

 یہ واقعہ ملک میں چینی شہریوں پر حملوں کے حالیہ سلسلے میں تازہ ترین واقعہ ہے۔ اپریل میں جامعہ کراچی کے کنفیوشس انسٹی ٹیوٹ کے باہر خودکش حملے میں تین چینی شہری ہلاک ہوگئے تھے۔

یہ ایک تازہ ترین خبر ہےمیڈیا میں ابتدائی رپورٹیں بعض اوقات غلط بھی ہو سکتی ہیں۔۔