وزیراعظم شہباز شریف آذربائیجان کے دو روزہ سرکاری دورے پر روانہ

 

اسلام آباد: وزیراعظم شہباز شریف جمعہ کو آذربائیجان کے دو روزہ سرکاری دورے پر روانہ ہوگئے، جہاں وہ باہمی تعاون، تجارت اور دفاع سمیت مختلف شعبوں میں تعلقات کو مزید فروغ دینے پر بات چیت کریں گے۔وزیراعظم کو آذربائیجان کے صدر ایلہم علیوف نے باضابطہ طور پر دورے کی دعوت دی تھی۔ ان کے ہمراہ وزیر اطلاعات عطااللہ تارڑ سمیت اعلیٰ سطح کا وفد بھی موجود ہے۔

🔊PR No.3️⃣2️⃣9️⃣/2️⃣0️⃣2️⃣5️⃣

Curtain Raiser: Prime Minister Shehbaz Sharif Visit to Azerbaijan to Attend Fifth Anniversary of Victory Day Celebrations https://t.co/NBMSfGw0tx
🔗⬇️ pic.twitter.com/D1BFj5F0eM

— Ministry of Foreign Affairs - Pakistan (@ForeignOfficePk) November 7, 2025

وزارتِ خارجہ کے مطابق وزیراعظم کا یہ دورہ اُس وقت ہورہا ہے جب آذربائیجان اپنی فتح کے دن (Victory Day) کی پانچویں سالگرہ منا رہا ہے، جو آرمینیائی افواج سے اپنے مقبوضہ علاقوں کی بازیابی کی یاد میں منایا جاتا ہے۔

ترجمان دفترِ خارجہ نے کہا کہ اس دورے میں دونوں ممالک کے درمیان تجارت، سرمایہ کاری، توانائی، دفاع، تعلیم اور علاقائی رابطوں کے شعبوں میں تعاون کو مزید مضبوط بنانے پر اتفاق کیا جائے گا۔

پاکستان اور آذربائیجان کے تعلقات “برادرانہ، تاریخی اور باہمی اعتماد” پر مبنی ہیں۔ وزارت خارجہ کے مطابق پاکستان ہمیشہ آذربائیجان کی خودمختاری اور علاقائی سالمیت کی حمایت کرتا آیا ہے۔

وزیراعظم شہباز شریف اس سے قبل مئی 2025 میں بھی آذربائیجان کا دورہ کر چکے ہیں جہاں دونوں ممالک نے اقتصادی شراکت داری کو مزید گہرا کرنے پر اتفاق کیا تھا۔

صدر علیوف نے رواں سال اگست میں وزیراعظم شہباز شریف سے ٹیلیفونک رابطہ کیا تھا اور ناگورنو-کاراباخ تنازع پر پاکستان کی مسلسل حمایت پر شکریہ 

ادا کیا تھا۔