پیٹرول اور ڈیزل کی قیمت میں 4 روپے اضافہ، LPG سستی – اکتوبر 2025 اپڈیٹ

اسلام آباد (30 ستمبر 2025): وفاقی حکومت نے عوام پر ایک اور بوجھ ڈال دیا ہے اور پیٹرول اور ڈیزل کی قیمتوں میں اضافہ کر دیا گیا ہے، تاہم ایل پی جی (LPG) کی قیمت میں کمی کی گئی ہے۔

وزارتِ خزانہ کی جانب سے جاری نوٹیفکیشن کے مطابق پیٹرول کی قیمت فی لیٹر 4.07 روپے جبکہ ہائی اسپیڈ ڈیزل (HSD) کی قیمت فی لیٹر 4.04 روپے بڑھا دی گئی ہے۔

پیٹرولیم مصنوعات کی نئی قیمتیں

پیٹرول: 268.68 روپے فی لیٹر (پہلے 264.61 روپے)

ہائی اسپیڈ ڈیزل: 276.81 روپے فی لیٹر (پہلے 272.77 روپے)

یہ اضافہ اوگرا (OGRA) اور وزارتِ توانائی کی سفارشات کے بعد کیا گیا۔

پیٹرول کی قیمت بڑھنے سے موٹرسائیکل سواروں، رکشہ ڈرائیورز اور ذاتی گاڑیاں رکھنے والے غریب افراد کو براہِ راست نقصان پہنچے گا، جبکہ ڈیزل کے مہنگا ہونے سے ٹرانسپورٹ کرایوں اور زرعی لاگت میں اضافہ ہوگا۔ ماہرین کے مطابق ڈیزل کی قیمت بڑھنے سے اشیائے خوردونوش کی قیمتوں میں بھی مہنگائی کی نئی لہر آئے گی۔

دوسری جانب عوام کے لیے کچھ ریلیف بھی دیا گیا ہے۔ اوگرا نے اکتوبر کے لیے ایل پی جی (LPG) کی قیمت میں فی کلو 6.70 روپے کمی کا اعلان کیا ہے۔

اب 11.8 کلو گرام کا گھریلو سلنڈر تقریباً 2,448 روپے میں دستیاب ہوگا، جو پچھلے مہینے کی قیمت 2,527 روپے سے کم ہے۔ اوگرا کے مطابق یہ کمی سعودی  کمپنی آرمکو (Aramco) کے نرخ اور ڈالر کے ایکسچینج ریٹ میں کمی کی وجہ سے ممکن ہوئی۔

معاشی تجزیہ کاروں کا کہنا ہے کہ ایک طرف پیٹرول اور ڈیزل کی قیمتوں میں اضافہ مہنگائی کو مزید بڑھا دے گا، تو دوسری جانب LPG کی کمی معمولی ریلیف ہے جو مجموعی طور پر مہنگائی کے اثرات کو کم نہیں کر سکے گی۔