آٹے اور سبزیوں کے بعد چینی کا بحران آنے کو تیار ؟

اسلام آباد / راولپنڈی:پاکستان میں چینی کا بحران شدت اختیار کر گیا ہے۔ بازار میں فی کلو چینی کی قیمت 200 روپے کے قریب پہنچ گئی، جبکہ سرکاری نرخ 181 روپے فی کلوگرام پر مقرر ہونے کے باوجود مارکیٹ میں کہیں دستیاب نہیں۔

چینی کے نرخوں میں اضافے کے ساتھ عوامی مشکلات میں بھی اضافہ ہو گیا ہے۔ ہول سیل مارکیٹ میں 50 کلوگرام چینی کا تھیلا 10,000 روپے تک جا پہنچا ہے  جو گزشتہ ہفتے کے مقابلے میں نمایاں اضافہ ہے۔

تاجروں کے مطابق مال برداری کے کرایوں میں 25 فیصد اضافہ ہوا ہے، خاص طور پر کراچی، راولپنڈی اور پشاور کے درمیان، جس سے چینی کی ترسیل مزید مہنگی ہو گئی ہے۔

مارکیٹ ذرائع کا کہنا ہے کہ اگر صورتحال یہی رہی تو آئندہ ہفتوں میں چینی کی قیمت مزید بڑھ سکتی ہے۔

وفاقی وزیر برائے فوڈ سیکیورٹی رانا تنویر حسین نے اعتراف کیا کہ حکومت چینی ملوں پر دباؤ نہیں ڈال رہی کہ وہ گنے کی کرشنگ جلد شروع کریں۔

ان کا کہنا تھا:

 “ملیں خود فیصلہ کریں گی کہ کرشنگ کب شروع کرنی ہے، چاہے نومبر کے پہلے ہفتے یا بیسویں تاریخ کو۔”

ذرائع کے مطابق حکومت اور مل مالکان کے درمیان نومبر کے آغاز میں کرشنگ شروع کرنے کا معاہدہ ہو چکا تھا، مگر حکومت نے اس پر عملدرآمد نہیں کیا۔

ماہرین کا کہنا ہے کہ تاخیر سے کرشنگ شروع ہونے سے کسانوں کو نقصان ہوتا ہے، کیونکہ گنے کا وزن اور معیار کم ہو جاتا ہے، جبکہ نئی فصل کی کاشت میں بھی تاخیر ہوتی ہے۔

کسان رہنماؤں نے الزام عائد کیا ہے کہ حکومت نے گنے کی کرشنگ میں تاخیر کر کے چینی مل مالکان کے مفادات کا تحفظ کیا ہے۔

انہوں نے کہا کہ دیر سے کرشنگ نہ صرف فصل کو نقصان پہنچاتی ہے بلکہ ملک میں چینی کی قلت اور مہنگائی کی ایک نئی لہر بھی پیدا کرتی ہے۔

مارکیٹ ماہرین کے مطابق اگر گنے کی کرشنگ سیزن نومبر کے آخر تک تاخیر کا شکار ہوا تو قیمتیں 220 روپے فی کلو تک پہنچ سکتی ہیں۔

عوام پہلے ہی سبزیوں، پیٹرول، اور دیگر اشیائے خورونوش کی بلند قیمتوں سے پریشان ہیں۔ماہرین نے حکومت سے مطالبہ کیا ہے کہ وہ چینی کے بحران پر ہنگامی اقدامات کرے، تاکہ عوام کو مزید مہنگائی سے بچایا جا سکے، اور ملز کو فوری کرشنگ شروع کرنے کا پابند بنایا جائے۔