سانائے تاکائیچی جاپان کی پہلی خاتون وزیرِ اعظم منتخب

ٹوکیو :جاپان کی پارلیمنٹ نے منگل کے روز سخت گیر نظریات رکھنے والی سانائے تاکائیچی (Sanae Takaichi) کو ملک کی پہلی خاتون وزیرِ اعظم منتخب کر لیا۔ جو جاپان کی سیاسی تاریخ میں ایک نیا باب ہے۔

465 رکنی ایوانِ زیریں (Lower House) میں سے 237 اراکین نے تاکائیچی کے حق میں ووٹ دیا، جبکہ حزبِ اختلاف کی جماعتوں نے مخالفت کی۔

یہ کامیابی اُس وقت ممکن ہوئی جب تاکائیچی کی جماعت لبرل ڈیموکریٹک پارٹی (LDP) نے دائیں بازو کی جماعت جاپان اِنویشن پارٹی (JIP) کے ساتھ آخری لمحے پر اتحاد کا معاہدہ کیا۔

اگرچہ نئی حکومت اب بھی دو نشستوں سے اکثریت سے کم ہے، لیکن ماہرین کے مطابق یہ قدم سیاسی استحکام اور تاریخی تبدیلی کی طرف اشارہ ہے۔

سانائے تاکائیچی کو سابق وزیرِ اعظم شِنزو آبے (Shinzo Abe) کا قریبی شاگرد سمجھا جاتا ہے۔

ان کی پالیسیوں میں روایتی جاپانی اقدار کا دفاع، ہم جنس شادی کی مخالفت، اور شاہی خاندان میں مرد وارث کے نظام کو برقرار رکھنے جیسے نظریات شامل ہیں۔

وہ خواتین کے لیے علیحدہ خاندانی نام کی اجازت کی بھی مخالف رہی ہیں، جس پر انہیں جاپان کے جدید طبقات کی جانب سے تنقید کا سامنا ہے۔

وزیرِ اعظم تاکائیچی نے عہدہ سنبھالتے وقت کہا:

 “جاپان کو اس وقت سب سے زیادہ سیاسی استحکام کی ضرورت ہے۔ استحکام کے بغیر ہم نہ معیشت کو مضبوط کر سکتے ہیں، نہ ہی عالمی سطح پر اپنا کردار بہتر بنا سکتے ہیں۔”

تاکائیچی کو اپنے دورِ حکومت میں کمزور معیشت، بجٹ خسارے اور بڑھتی مہنگائی جیسے بڑے چیلنجز کا سامنا ہے۔

عالمی سطح پر انہیں چین اور امریکہ کے درمیان توازن برقرار رکھنا ہوگا، جبکہ اندرونِ ملک صنفی مساوات اور سماجی اصلاحات پر دباؤ بڑھ رہا ہے۔اگرچہ ان کی تقرری کو خواتین کے لیے جاپان میں ایک سنگ میل کہا جا رہا ہے، لیکن تجزیہ کاروں کے مطابق ان کے سخت گیر نظریات کے باعث خواتین کے حقوق میں بڑی پیش رفت کی توقع کم ہے۔