ایڈوکیٹ حیدر مجید 9 مئی کیس میں فوج کے حوالے ؟

پیر کو لاہور ہائی کورٹ (ایل ایچ سی) کو بتایا گیا کہ پی ٹی آئی کے وکیل حیدر مجید ایڈووکیٹ کو 9 مئی کو لاہور کے جناح ہاؤس میں توڑ پھوڑ میں مبینہ طور پر ملوث ہونے پر مقدمے کی سماعت کے لیے فوج کے حوالے کر دیا گیا ہے۔

 یہ پیش رفت پی ٹی آئی کے سربراہ عمران خان کے بھتیجے بیرسٹر حسن نیازی کو انہی الزامات کے تحت ٹرائل کے لیے فوج کے حوالے کیے جانے کے چند دن بعد سامنے آئی ہے۔

 19 اگست کو حیدر مجید کے والد محمد مجید نے اپنے بیٹے کی بازیابی کے لیے لاہور ہائی کورٹ میں درخواست دائر کی، جس میں انہوں نے کہا کہ حیدر مجید کو 13 اگست کی رات گئے نیازی کے ساتھ حراست میں لیا گیا تھا۔

 پی ٹی آئی کے مطابق حیدر مجید انصاف اسٹوڈنٹس فیڈریشن پنجاب ونگ کے کنوینر ہیں۔

 آج، لاہور ہائیکورٹ نے حیدر مجید کے والد کی طرف سے دائر درخواست پر سماعت کی، جس کے دوران لاہور پولیس نے 17 اگست کو دستخط شدہ رپورٹ پیش کی، جس میں عدالت کو بتایا گیا کہ ملزم کو فوج کے حوالے کر دیا گیا ہے۔

 رپورٹ میں کہا گیا کہ حسان نیازی اور حیدر مجید دونوں کو سرور روڈ پولیس نے ایبٹ آباد کے میرپور تھانے سے دہشت گردی کے ایک مقدمے میں گرفتار کیا تھا۔

 رپورٹ میں کہا گیا کہ فوج کے ایک کمانڈنگ افسر کی جانب سے دو خطوط موصول ہوئے جن کے مطابق حسان نیازی اور حیدر دونوں کو پاکستان آرمی ایکٹ 1952 کی دو دفعات کے تحت ’تفتیش اور انکوائری‘ کے لیے فوج کے حوالے کیا جا رہا ہے۔

 پولیس نے ایڈیشنل ایڈووکیٹ جنرل غلام سرور نہنگ کے ذریعے اپنی رپورٹ لاہور ہائیکورٹ میں جمع کرائی جس کے بعد جسٹس سلطان تنویر نے کیس کی سماعت کل (منگل) تک ملتوی کر دی۔

 ماضی میں، دیگر مقدمات کے علاوہ، حیدر مجید سابق وزیر داخلہ رانا ثناء اللہ اور پولیس کے اعلیٰ حکام کے خلاف پی ٹی آئی کے جلسے کے دوران وکلا پر مبینہ تشدد کے مقدمے میں درخواست گزار تھے۔  نیازی ان کی نمائندگی کرنے والے وکلاء میں سے ایک تھے۔

 اس سال کے شروع میں، وہ پی ٹی آئی رہنما اسد عمر کی اہلیہ کی جانب سے دائر مقدمے میں بھی قانونی ٹیم کا حصہ تھے جس میں گرفتاری کے بعد اپنے شوہر کی بازیابی کا مطالبہ کیا گیا تھا۔