پٹرول نہ دینے والے پٹرول پمپس کے خلاف سخت کاروائی کریں گے وزیر پٹرولیم مصدق ملک

 

اسلام آباد: پیٹرولیم مصنوعات کی مصنوعی قلت پیدا کرنے کے لیے ذخیرہ اندوزوں کو مورد الزام ٹھہراتے ہوئے وزیر مملکت برائے پیٹرولیم ڈاکٹر مصدق ملک نے بدھ کو انہیں "سنگین نتائج" سے خبردار کیا۔

 وزیر مملکت برائے پیٹرولیم ڈاکٹر مصدق ملک کی جانب سے شیئر کی گئی دستاویز پاکستان میں پیٹرولیم مصنوعات کے اعدادوشمار کو ظاہر کرتی ہے۔ 

 وزیر نے بدھ کو ایک پریس کانفرنس میں بتایا کہ "ملک میں پٹرولیم مصنوعات کا وافر ذخیرہ موجود ہے ، 20 دنوں کی ضروریات کے لیے پیٹرول (363,085 میٹرک ٹن) اور 29 دنوں کے لیے ڈیزل (515,687 میٹرک ٹن) موجود ہے ۔

وزیر پیٹرولیم نے مزید کہا کہ چند لوگ پٹرول اور ڈیزل کو مستقبل میں مہنگے داموں فروخت کرنے کی امید کے ساتھ ذخیرہ کرکے مصنوعی قلت پیدا کرنے میں ملوث ہیں۔

 مصدق ملک نے کہا کہ حکومت کسی بھی قیمت پر ریاست کی رٹ کو یقینی بنائے گی اور اشارہ دیا کہ آئل مارکیٹنگ کمپنیوں کے لائسنس، جو اس طرح  کی غیر قانونی سرگرمیوں میں ملوث ہیں، منسوخ کر دی جائیں گی۔

 وزیر پیٹرولیم نے کہا، ’’میں پیٹرولیم مصنوعات کی ذخیرہ اندوزی کرنے والوں سے درخواست کرتا ہوں کہ وہ اس عمل سے گریز کریں اور ریاست کی رٹ کو چیلنج نہ کریں۔‘‘

 ڈاکٹر مصدق ملک نے مزید کہا کہ پیٹرولیم مصنوعات کی قیمتوں میں وفاقی حکومت بین الاقوامی مارکیٹ اور روپے اور ڈالر کی برابری کو مدنظر رکھتے ہوئے مقررہ وقت پر نظر ثانی کرے گی۔

 ایک سوال کے جواب میں، وزیر پٹرولیم نے کہا کہ جاری موسم سرما کے دوران، موجودہ حکومت نے، وزیر اعظم شہباز شریف کی قیادت میں، "بہتر گیس مینجمنٹ کو یقینی بنایا، جس کے نتیجے میں صارفین، خاص طور پر گھریلو سیکٹر کو گزشتہ 10 سال کے مقابلے میں بہتر فراہمی ہوئی" 

 ایک اور سوال کے جواب میں انہوں نے کہا کہ امید ہے کہ روس کے ساتھ معاہدہ طے پا جائے گا جس کے بعد پاکستان میں کم قیمت خام تیل کی آمد شروع ہو جائے گی۔

 ایک دستاویز جسے وزیر پٹرولیم ڈاکٹر مصدق ملک نے پریس کانفرنس کے دوران صحافیوں کے ساتھ شیئر کیا، اس سے ظاہر ہوتا ہے کہ ملک میں 20 دن (363,085 میٹرک ٹن)، ڈیزل 29 دن (515,687 میٹرک ٹن) اور ایندھن کا تیل 20 دن (466,702 میٹرک ٹن) کے لیے کافی مقدار میں موجود ہے۔ 

 پاکستان کو ادائیگیوں کے توازن کے بحران کا سامنا ہے اور روپے کی گرتی ہوئی قدر درآمدی اشیا کی قیمتوں میں اضافہ کر رہی ہے۔  پاکستان کے درآمدی بل کا ایک بڑا حصہ توانائی پر مشتمل ہے۔

 پاکستان عام طور پر اپنی سالانہ بجلی کی طلب کا ایک تہائی سے زیادہ درآمدی قدرتی گیس استعمال کرتا ہے، جس کی قیمتیں یوکرین پر روس کے حملے کے بعد بڑھ گئی تھیں۔