تھائی لینڈ نے کمبوڈیا سرحد پر فضائی حملے کر دیے، صورتحال شدید کشیدہ

تھائی لینڈ اور کمبوڈیا کی سرحد پر ایک بار پھر حالات سنگین ہو گئے ہیں۔ تھائی فوج نے تصدیق کی ہے کہ متنازعہ سرحدی علاقے میں فضائی حملے شروع کر دیے گئے ہیں، جب کہ دونوں ممالک ایک دوسرے پر جنگ بندی توڑنے کا الزام لگا رہے ہیں۔ فوجی ترجمان کے مطابق، سرحدی جھڑپوں میں ایک تھائی فوجی ہلاک اور چار زخمی ہوئے، جس کے بعد تھائی فضائیہ نے کمبوڈیا کے متعدد مبینہ عسکری ٹھکانوں کو نشانہ بنایا۔ دوسری جانب کمبوڈیا کی وزارتِ دفاع کا کہنا ہے کہ تھائی فوج نے صبح سویرے دو مقامات پر حملے کیے، لیکن کمبوڈین فوج نے کسی قسم کا جوابی ایکشن نہیں لیا۔ تھائی فوج کا دعویٰ ہے کہ کمبوڈیا نے BM-21 راکٹ تھائی شہری علاقوں کی جانب داغے، تاہم ابھی تک کسی شہری کی ہلاکت کی تصدیق نہیں ہوئی۔ فوج نے اسے جنگ بندی معاہدے کی سنگین خلاف ورزی قرار دیا ہے۔ واضح رہے کہ دونوں ملکوں کے درمیان جولائی میں پانچ روزہ جھڑپیں ہوئی تھیں جن میں 48 افراد مارے گئے اور تقریباً تین لاکھ افراد کو نقل مکانی کرنا پڑی تھی۔ بعد ازاں ایک امن معاہدہ ہوا، لیکن حالیہ بارودی سرنگ دھماکے کے بعد تھائی لینڈ نے اس معاہدے پر عمل درآمد روک دیا تھا، جس کے بعد کشیدگی دوبارہ بڑھ گئی۔ تھائی حکام کے مطابق، متاثرہ سرحدی اضلاع سے اب تک 3 لاکھ 85 ہزار سے زائد شہریوں کو محفوظ مقامات پر منتقل کر دیا گیا ہے، جبکہ 35 ہزار سے زیادہ افراد پناہ گاہوں میں موجود ہیں۔ سرحدی حالات مسلسل خراب ہو رہے ہیں اور فوجی سرگرمیوں میں تیزی کے باعث مزید کشیدگی کا خدشہ ظاہر کیا جا رہا ہے۔