ٹرمپ نے وینیزویلا جانے والے تیل ٹینکروں کو روکنے کا حکم دے دیا

واشنگٹن، امریکی صدر ڈونلڈ ٹرمپ نے اعلان کیا ہے کہ وہ وینیزویلا جانے اور وہاں سے نکلنے والے تمام آئل ٹینکروں پر مکمل بحری روک (محاصرہ) لگانے کا حکم دے رہے ہیں۔ یہ اقدام صدر نیکولس مادورو کی حکومت پر دباؤ بڑھانے کے لیے کیا گیا ہے، جس پر امریکہ نے الزام لگایا ہے کہ وہ تیل کے ذرائع کو منشیات اسمگلنگ، دہشت گردی اور دیگر غیر قانونی سرگرمیوں کی مالی معاونت کے لیے استعمال کر رہی ہے۔ امریکی محکمہ خزانہ کی جانب سے پہلے ہی وینیزویلا کے کئی تیل ٹینکروں کو پابندیوں کی فہرست میں شامل کیا گیا تھا۔ ٹرمپ کے حکم کے بعد، امریکہ ان ٹینکروں کو نہ تو وینیزویلا جانے دے گا اور نہ ہی وہاں سے نکلنے کی اجازت دے گا۔ وینیزویلا کے حکام نے اس اقدام کو بین الاقوامی قوانین کی خلاف ورزی اور ایک غیر منطقی اور خطرناک قرار دیا ہے۔ ساتھ ہی انہوں نے کہا ہے کہ امریکہ کا یہ اقدام علاقائی تناؤ میں مزید اضافہ کرے گا۔خطے میں امریکی بحریہ کے متعدد جہاز پہلے سے موجود ہیں۔ اسکے نفاذ کے طریقے ابھی واضح نہیں، مگر امریکی حکام نے خبردار کیا ہے کہ وہ کسی بھی غیر قانونی ٹینکر کی نقل و حرکت روکنے کے لیے تمام وسائل استعمال کریں گے۔ وینیزویلا کی معیشت تیل کی برآمدات پر بہت انحصار کرتی ہے۔ امریکی بحری محاصرے سے تیل کی برآمدات رکنے کا خطرہ ہے، جس سے ملک میں اقتصادی بحران مزید گہرا ہو سکتا ہے اور بین الاقوامی تیل مارکیٹ میں بھی اتار چڑھاؤ متوقع ہے۔ صدر ٹرمپ نے کہا ہے کہ یہ اقدام امریکی قومی سلامتی اور بین الاقوامی قانون کی پاسداری کے لیے ضروری ہے۔ انہوں نے واضح کیا کہ امریکہ صدر نکولس مادورو کی حکومت کے غیر قانونی اقدامات کے خلاف سخت موقف اختیار کرے گا۔