11واں این ایف سی ایوارڈ: وفاق صوبوں کی رائے سننے کو تیار، پہلا اجلاس اسلام آباد میں منعقد

اسلام آباد: 11ویں قومی مالیاتی کمیشن (NFC) ایوارڈ کا پہلا اجلاس آج وفاقی دارالحکومت میں ہوا، جس کی صدارت وفاقی وزیر خزانہ محمد اورنگزیب نے کی۔ اجلاس میں چاروں صوبوں کے وزرائے اعلیٰ اور اعلیٰ حکام نے شرکت کی۔

وزارت خزانہ میں 11ویں قومی مالیاتی کمیشن کا افتتاحی اجلاس

وفاقی وزیر خزانہ سینیٹر محمد اورنگزیب اجلاس کی صدارت کر رہے ہیں

وزیر خزانہ نے اپنے ابتدائی کلمات میں وزرائے اعلیٰ، صوبائی وزرائے خزانہ، سیکرٹری صاحبان، اور دیگر ارکان کا 11 ویں نیشنل فنانس کمیشن کے افتتاحی اجلاس میں شرکت… pic.twitter.com/uxQrclcCId

— Ministry of Finance, Government of Pakistan (@Financegovpk) December 4, 2025

وزیر خزانہ نے افتتاحی خطاب میں کہا کہ وفاق صوبوں کی رائے سننے اور باہمی مشاورت کے ذریعے وسائل کی منصفانہ تقسیم کے لیے مکمل طور پر تیار ہے۔ وزیر خزانہ نے بتایا کہ 10ویں این ایف سی ایوارڈ کی مدت رواں سال جولائی میں ختم ہو چکی ہے، اس لیے نیا ایوارڈ آئینی تقاضہ ہے۔ انہوں نے کہا کہ سیلاب اور ملکی حالات کے باعث اجلاس میں تاخیر ہوئی لیکن اب حکومت اس عمل کو “شفاف اور تیز رفتار” طریقے سے آگے بڑھانا چاہتی ہے۔صوبوں نے بھی اس آئینی ذمہ داری کو بروقت ادا کرنے کا بھرپور ارادہ ظاہر کیا، پنجاب، خیبر پختونخوا اور سندھ میں آنے والے تباہ کن سیلاب کے باعث یہ اجلاس مؤخر کرنا پڑا، این ایف سی کے حوالے سے قیاس آرائیوں اور خدشات کا بہترین حل مخلصانہ اور شفاف مکالمہ ہے، آج ہم یہاں کھلے ذہن اور بغیر کسی تعصب کے موجود ہیں، ہماری پہلی ترجیح ایک دوسرے کی بات سننا ہے، وفاقی حکومت یہاں صوبوں کے مؤقف کو سننے کے لیے موجود ہے، اجلاس میں شریک وزرائے اعلیٰ سندھ مراد علی شاہ اور خیبرپختونخوا سہیل آفریدی سمیت دیگر نمائندوں نے بھی صوبائی مؤقف پیش کیا۔ اجلاس میں فیصلہ کیا گیا کہ این ایف سی کے تحت 5 سے 6 ورکنگ گروپس تشکیل دیے جائیں گے، جو مالیاتی امور، وسائل کی تقسیم، ٹیکس اصلاحات اور اقتصادی حکمت عملی پر سفارشات تیار کریں گے۔ مزید بتایا گیا کہ این ایف سی کا اگلا اجلاس 7 سے 15 جنوری کے درمیان ہوگا۔ وزیر خزانہ نے کہا کہ ملک کو حالیہ معاشی چیلنجز، بھارت کے ساتھ کشیدگی اور سیلاب جیسی صورتحال میں ایک مضبوط مالیاتی فریم ورک کی ضرورت ہے۔ اجلاس کے اختتام پر تمام شرکا نے اتفاق کیا کہ قومی مفاد کے لیے ایک جامع، قابلِ عمل اور منصفانہ این ایف سی ایوارڈ ناگزیر ہے